નવી દિલ્હી  :યુરોપની આબોહવા એજન્સી કોપરનિકસ ક્લાઈમેટ ચેન્જ સર્વિસનું કહેવું છે કે એપ્રિલ ૨૦૨૪ એ અત્યાર સુધીનો સૌથી ગરમ મહિનો બનવાનો છે. એપ્રિલ ૨૦૨૪માં ભારે ગરમી હતી અને આ સમયગાળા દરમિયાન સમગ્ર વિશ્વમાં પૂર, દુષ્કાળ, વરસાદ જેવી આપત્તિઓથી જનજીવન ખરાબ રીતે પ્રભાવિત થયું હતું. આ સતત ૧૧મો મહિનો છે જેમાં રેકોર્ડ તાપમાન નોંધાયું છે. તાપમાનમાં વધારો અલ નીનોની અસર અને વાતાવરણમાં ફેરફારને આભારી છે.

રિપોર્ટ અનુસાર, એપ્રિલમાં સરેરાશ તાપમાન ૧૫.૦૩ ડિગ્રી સેલ્સિયસ હતું, જે ૧૮૫૦-૧૯૦૦ના ઔદ્યોગિક સમય પહેલાના તાપમાન કરતાં ૧.૫૮ ડિગ્રી સેલ્સિયસ વધારે છે. જ્યારે ૧૯૯૧-૨૦૨૦ની સરખામણીમાં એપ્રિલ ૨૦૨૪નું સરેરાશ તાપમાન ૦.૬૭ ડિગ્રી સેલ્સિયસ વધારે હતું. અગાઉ એપ્રિલ ૨૦૧૬માં સૌથી વધુ તાપમાન નોંધાયું હતું, પરંતુ એપ્રિલ ૨૦૨૪એ તે રેકોર્ડ પણ તોડી નાખ્યો છે. કોપરનિકસ ક્લાઈમેટ એજન્સીના ડાયરેક્ટર કાર્લો બ્યુનોટેમ્પોએ જણાવ્યું હતું કે આ વર્ષની શરૂઆતમાં અલ નીનો અસર ટોચ પર પહોંચી હતી, પરંતુ હવે પૂર્વીય પ્રશાંત મહાસાગરની સપાટીનું તાપમાન સામાન્ય તરફ આગળ વધી રહ્યું છે, આના કારણે સમુદ્રની સપાટીનું તાપમાન હજુ પણ વધી રહ્યું છે એવું માનવામાં આવે છે કે એપ્રિલ ૨૦૨૪માં રેકોર્ડ તાપમાન નોંધાયું હતું.

એજન્સીએ તેના અહેવાલમાં જણાવ્યું હતું કે વૈશ્વિક તાપમાન છેલ્લા ૧૨ મહિનામાં સૌથી વધુ નોંધાયું હતું અને તે ઔદ્યોગિક સમયગાળા (૧૮૫૦-૧૯૦૦) પહેલા કરતા ૧.૬૧ ડિગ્રી સેલ્સિયસ વધારે છે. વિશ્વભરના દેશોએ વૈશ્વિક તાપમાનના સરેરાશ વધારાને પૂર્વ-ઔદ્યોગિક સ્તર કરતાં ૧.૫ ડિગ્રી સેલ્સિયસ સુધી મર્યાદિત કરવાનો પ્રયાસ કરવો જાેઈએ, નહીં તો તેના ગંભીર પરિણામો આવી શકે છે.

જર્મનીના પોટ્‌સડેમ ઈન્સ્ટિટ્યૂટ ફોર ક્લાઈમેટ ઈમ્પેક્ટ રિસર્ચના તાજેતરના અભ્યાસ અનુસાર, ક્લાઈમેટ ચેન્જના કારણે વૈશ્વિક અર્થતંત્રને ૨૦૪૯ સુધીમાં દર વર્ષે લગભગ ૩૮ લાખ કરોડ રૂપિયાનું નુકસાન વેઠવું પડી શકે છે. ખાસ કરીને એવા દેશો જે ક્લાઈમેટ ચેન્જ માટે જવાબદાર નથી તેઓને ક્લાઈમેટ ચેન્જને કારણે સૌથી વધુ નુકસાન થશે.એશિયન દેશો આ દિવસોમાં હીટ વેવની સમસ્યાનો સામનો કરી રહ્યા છે અને ફિલિપાઈન્સમાં પણ શાળાઓ બંધ કરવી પડી.