મુંબઇ 

ટેલિવુડ કપલ દેબિના બેનર્જી અને ગુરમીત ચૌધરી હાલ નાનકડા વેકેશન માટે નાસિક પહોંચ્યા છે. વ્હાઈટ આઉટફિટમાં કપલની સુંદર તસવીરો સોશિયલ મીડિયા પર વાયરલ થઈ રહી છે. કોરોના મુક્ત થયા બાદ દેબિના અને ગુરમીત ફરવા ઉપડ્યા છે. નાસિક પહોંચીને તેઓ સુંદર તસવીરો અને વિડીયો ફેન્સ સાથે શેર કરી રહ્યા છે. 

ગુરમીતે દેબિના સાથેનો એક વિડીયો શેર કર્યો છે. જેમાં સુંદર સ્થળે કપલ ડાન્સ અને રોમાન્સ કરતું જોવા મળે છે. ગુરમીતે વિડીયો શેર કરીને લખ્યું, "એક લાંબા બ્રેક પછી એક બ્રેક જરૂરી હતો. ઘરથી બસ થોડા જ અંતરે અમે વાઈનરી (દ્રાક્ષના વેલા ઉછેરવાનું કાચું મકાન) વિશે ઘણું શીખી રહ્યા છીએ. વિદેશમાં હોઈએ તેવું લાગે છે. ખરા અર્થમાં ભારત અદ્ભૂત છે. કોરોના કાળમાં અમને આ અહેસાસ થયો છે." 

ગુરમીતની પત્ની દેબિનાએ પણ પોતાના ઈન્સ્ટાગ્રામ અકાઉન્ટ પર ગુરમીત સાથેના સ્ટેકેશનની તસવીરો શેર કરી છે. જેમાં તે અને ગુરમીત સાઈકલિંગ કરતા જોવા મળે છે. દેબિનાએ તસવીરો શેર કરતાં લખ્યું, "ઓહ! ખૂબ સુંદર દિવસ છે અને હજી તો શરૂઆત થઈ છે." તસવીરોમાં જોઈ શકાય છે કે ગુરમીત-દેબીના ડબલ સાઈકલ ચલાવતા જોવા મળે છે. 

ઉલ્લેખનીય છે કે, દેબિના અને ગુરમીત થોડા દિવસ પહેલા જ કોરોનામાંથી સાજા થયા છે. સપ્ટેમ્બરના છેલ્લા અઠવાડિયામાં તેઓ કોરોનાથી સંક્રમિત થયા હતા. બંને ઘરમાં જ ક્વોરન્ટીન થયા હતા. નવરાત્રી પહેલા જ કપલે કોરોના રિપોર્ટ નેગેટિવ આવ્યો હોવાની વાત ફેન્સ સાથે શેર કરી હતી. 

ગુરમીત પોતાના શૂટિંગ શિડ્યુલ માટે ગયો એ પહેલા પણ કપલ થોડા દિવસના સ્ટેકેશન (પોતાના જ દેશમાં હોલિડે પર જવું તે) પર ગયા હતા. વર્કફ્રંટની વાત કરીએ તો, ગુરમીત હાલ ફિલ્મો અને ડિજિટલ પ્લેફોર્મના શો પર ધ્યાન કેંદ્રિત કરી રહ્યો છે. ત્યારે દેબિના છેલ્લે ટીવી સીરિયલ 'અલાદ્દીન: નામ તો સુના હોગા'માં જોવા મળી હતી. જણાવી દઈએ કે, દેબિના અને ગુરમીતે ટીવી સીરિયલ 'રામાયણ'માં ભગવાન શ્રી રામ અને સીતા માતાનો રોલ કર્યો હતો. આ શોના સેટ પર જ બંને કલાકારો પ્રેમમાં પડ્યા હતા અને 2011માં ગુરમીત-દેબિના લગ્નના તાંતણે બંધાયા હતા. ગુરમીત-દેબિના ટીવીના પોપ્યુલર કપલ્સ પૈકીના એક છે.