બરોડા સ્ટેટ ઉપરાંત ગોલકોન્ડા બ્લ્યુ ઇન્દોરના રાજા પાસે પણ હતો

ભારતના રાજાઓના ઇતિહાસની શાન વધારતા એક અણમોલ હીરાની ૧૪મી મેના રોજ લીલામી થવા જઇ રહી છે. આ હીરાનું નામ ગોલકોન્ડા બ્લુ છે. આ એક દુર્લભ બ્લ્યુ ડાયમંડ છે. તે પહેલા વડોદરા અને ઇન્દોરના મહારાજાઓના ખજાનાની શાન હતો.

૧૪ મેના રોજ લીલામી : ડાયમંડનો ભાવ રૂા. ૩૦૦થી રૂા. ૪૩૦ કરોડ હશે

૧૪મી મેના રોજ જિનિવામાં ક્રિસ્ટીઝના મેગ્નિફિસન્ટ જ્વેલ્સ ઓક્શનમાં ગોલકોન્ડા બ્લ્યુની લીલામી થશે. આ બ્લ્યુ ડાયમંડ ૨૩.૨૪ કેરેટનો છે. તેને પેરિસના એક જાણીતા ઝવેરીએ એક સુંદર વીંટીમાં જડયો છે. આશા છેકે, આ હીરાની કિંમત ૩.૫થી ૫ કરોડ ડોલર હશે. જેનું ભારતીય રૂપિયામાં મૂલ્ય રૂા. ૩૦૦થી ૪૩૦ કરોડ જેટલું થાય છે.

તેલંગાણાની ગોલકોંડા ખાણ પરથી હિરાનું નામ પડયું

આ હીરાનું નામ ગોલકોંડાની ખાણો પર રાખવામાં આવ્યું છે. આ ખાણો તેલંગાણામાં છે. ક્રિસ્ટીના જણાવ્યા મુજબ આ હીરો ક્યારેક ઇન્દોરના મહારાજા યશવંતરાવ હોલકર બીજાનો હતો. ૧૯૨૩માં મહારાજાના પિતાએ આ હીરોને બ્રેસલેટમાં લગાવ્યો હતો. આ બ્રેસલેટ ફ્રેન્ચ ઝવેરી શોમે બનાવ્યો હતો.૧૯૪૭માં ભારતની સ્વતંત્રતા પછી આ બ્લ્યુ ડાયમંડને જાણીતા અમેરિકન ઝવેરી હેરી વિન્સ્ટનને વેચવામાં આવ્યો હતો. આ હીરો વડોદરાના મહારાજા સાથે પહોંચ્યો હતો. આ રીતે આ હીરાની શાહી સફર જારી રહી હતી.