ચેન્નાઈ:  ભારતીય મહિલા ટીમે સોમવારે અહીં રમાયેલી એકમાત્ર ટેસ્ટ મેચના ચોથા અને અંતિમ દિવસે દક્ષિણ આફ્રિકાને 10 વિકેટથી હરાવ્યું હતું. ભારતની જીતમાં શેફાલી વર્મા અને સ્નેહ રાણાનું મહત્વનું યોગદાન હતું. શેફાલીએ પ્રથમ દાવમાં બેવડી સદી ફટકારી હતી. જ્યારે રાણાએ 77 રનમાં આઠ વિકેટ લીધી હતી. શેફાલીના 197 બોલમાં 205 રન અને પ્રથમ વિકેટ માટે સ્મૃતિ મંધાના (149) સાથે 292 રનની ભાગીદારીના આધારે ભારતે છ વિકેટે 603 રન પર દાવ ડિકલેર કર્યો હતો. રાણાની શાનદાર સ્પિનના આધારે ટીમે દક્ષિણ આફ્રિકાનો પ્રથમ દાવ 266 રનમાં સમેટી લીધો હતો અને ભારતે પ્રથમ દાવમાં 337 રનની લીડ લીધા બાદ દક્ષિણ આફ્રિકાને ફોલોઓન કર્યું હતું. સુકાની લૌરા વૂલવર્થ (122) અને પૂર્વ કેપ્ટન સુને લુસ (109)ની સદીની ઈનિંગ્સ બાદ દક્ષિણ આફ્રિકાએ મધ્યમ ક્રમના બેટ્સમેન નાડીન ડી ક્લાર્કની 61 રનની ઈનિંગના આધારે 373 રન બનાવ્યા હતા અને ભારતને જીતવા માટે 37 રનનો ટાર્ગેટ આપ્યો હતો. . શુભા સતીશ (અણનમ 13) અને શેફાલી (24 અણનમ) એ 9.2 ઓવરમાં કોઈ પણ નુકશાન વિના વિજયની ઔપચારિકતા પૂરી કરી.