સોમવારે રિપબ્લિકન નેશનલ કન્વેન્શનની પ્રથમ રાત્રિ દરમિયાન ડોનાલ્ડ ટ્રમ્પે વિજયની પોઝ આપી હતી. તેમના પર જીવલેણ હુમલાના બે દિવસ બાદ પાર્ટીના સમર્થકોએ ટ્રમ્પનું ઉષ્માભર્યું સ્વાગત કર્યું હતું. ટ્રમ્પ ડાઉનટાઉન મિલવૌકીમાં ફિઝર્વ ફોરમમાં કાન પર જાડી પટ્ટી પહેરીને દેખાયા હતા. ભીડે “ફાઇટ! ફાઇટ” ના નારા લગાવ્યા અને તેમની મુઠ્ઠીઓ હલાવી. કાનમાં ગોળી વાગ્યા બાદ ટ્રમ્પે લોકોની સામે દેખાડેલી આ સ્ટાઇલ હતી. તેનો આ ફોટો દુનિયાભરમાં વાયરલ થયો હતો.

ભૂતપૂર્વ રાષ્ટ્રપતિએ “આભાર” કહ્યું અને કેટલાક બાળકોને મળ્યા અને યુએસ સેનેટર જે.ડી. વેન્સ સાથે બોક્સમાં બેઠા. ટ્રમ્પે વેન્સને પોતાના રનિંગ મેટ તરીકે જાહેર કર્યા છે. મતલબ કે, જાે ટ્રમ્પને કંઇક થશે અથવા તેઓ બીમાર પડી જશે તો તેમના રનિંગ મેટને ચૂંટણી પ્રચારની જવાબદારી સોંપવામાં આવશે. આ એ જ વેન્સ છે જે આઠ વર્ષ પહેલાં ૨૦૧૬ની રાષ્ટ્રપતિની ચૂંટણીમાં ટ્રમ્પના આકરા ટીકાકાર હતા. જાહેરમાં, તેમણે તે સમયે રિપબ્લિકન રાષ્ટ્રપતિ પદના ઉમેદવાર ટ્રમ્પને ‘મૂર્ખ’ કહ્યા હતા. વેન્સે ટ્રમ્પની સરખામણી એડોલ્ફ હિટલર સાથે કરી હતી. પરંતુ સોમવારે, ભૂતપૂર્વ રાષ્ટ્રપતિ ટ્રમ્પે વેન્સને તેમના સંભવિત રનિંગ સાથી તરીકે પસંદ કર્યા. ઓહાયોના વતની વેન્સ હવે ટ્રમ્પના સૌથી મજબૂત સમર્થકોમાંના એક બની ગયા છે. તે એવા સમયે ટ્રમ્પની સાથે ઊભા રહ્યા જ્યારે અન્ય હાઇ-પ્રોફાઇલ રિપબ્લિકન્સે આમ કરવાનો ઇનકાર કર્યો હતો.

રાષ્ટ્રપતિની ચૂંટણીને લઈને હંગામો ચાલુ છે. ટ્રમ્પ ગુરુવાર, ૧૮ જુલાઈના રોજ પ્રાઇમ-ટાઇમ ભાષણમાં પક્ષના નામાંકનને ઔપચારિક રીતે સ્વીકારવાના છે. ૫ નવેમ્બરની ચૂંટણીમાં તેઓ ડેમોક્રેટિક પ્રેસિડેન્ટ જાે બિડેનનો સામનો કરશે. સોમવારની ઘટના પેન્સિલવેનિયાના બટલરમાં ટ્રમ્પની રેલીમાં એક બંદૂકધારીએ ગોળીબાર કર્યાના ૪૮ કલાકથી ઓછા સમયમાં આવી. આ હુમલામાં ટ્રમ્પના કાન પર ગોળી વાગી હતી. આ ઘટનામાં તેમના એક સમર્થકનું મોત થયું હતું. બંદૂકધારીને તરત જ ઠાર મરાયો હતો. આ હુમલા પાછળનો હેતુ હજુ સ્પષ્ટ થયો નથી.

સેનેટર ટિમ સ્કોટે, જેઓ નોમિનેશન માટે થોડા સમય માટે ટ્રમ્પની વિરુદ્ધ હતા, તેમણે કહ્યું કે ભગવાને ટ્રમ્પનો જીવ બચાવ્યો. સ્કોટે કહ્યું, “આપણા ભગવાન હજી પણ બચાવે છે. તે હજી પણ બચાવે છે અને તે હજી પણ મુક્ત કરે છે. કારણ કે શનિવારે શેતાન રાઈફલ લઈને પેન્સિલવેનિયા આવ્યો હતો, પરંતુ એક અમેરિકન સિંહ તેના પગ પર પાછો પડ્યો અને તેણે ગર્જના શરૂ કરી!”

ટ્રમ્પની જાહેરાતના થોડા સમય બાદ, વેન્સ તેમની પત્ની ઉષા સાથે કન્વેન્શન ફ્લોર પર દેખાયા હતા. વેન્સ બુધવારે કોન્ફરન્સને સંબોધશે તેવી અપેક્ષા છે.

ઓપિનિયન પોલ્સ ૭૮ વર્ષીય ટ્રમ્પ અને ૮૧ વર્ષીય બિડેન વચ્ચે સખત સ્પર્ધા દર્શાવે છે. જાે કે ટ્રમ્પ ઘણા રાજ્યોમાં આગળ છે જે ચૂંટણી નક્કી કરવાની ક્ષમતા ધરાવે છે. ટ્રમ્પે ચૂંટણી હારી જાય તો પરિણામ સ્વીકારવા માટે હજુ સુધી પ્રતિબદ્ધ નથી. શનિવારે હત્યાના પ્રયાસ બાદ મસ્કે ખુલ્લેઆમ ટ્રમ્પનું સમર્થન કર્યું હતું. ઘાતક હુમલા પછી, ટ્રમ્પે કહ્યું કે તેઓ બિડેન સાથેના તેમના મતભેદોને ઉજાગર કરવાને બદલે રાષ્ટ્રીય એકતા પર ભાર મૂકવા માટે તેમના ભાષણમાં સુધારો કરી રહ્યા છે. ટ્રમ્પે વોશિંગ્ટન એક્ઝામિનરને જણાવ્યું હતું કે, “ભાષણ બે દિવસ પહેલા હતું તેના કરતા ખૂબ જ અલગ, ખૂબ જ અલગ હશે.” રિપબ્લિકન ઉમેદવાર જાહેર થયા બાદ તેઓ આ ભાષણ આપવા જઈ રહ્યા છે.