મુંબઈ-

એલઆઈસી હાઉસિંગ ફાઇનાન્સે હોમ લોન માર્કેટને વિસ્તૃત કરવા માટે ઇન્ડિયા પોસ્ટ પેમેન્ટ બેંક સાથે કરાર કર્યો છે. આ કરાર પછી પોસ્ટ ઓફિસ બેંકના ૪.૫ કરોડ ગ્રાહકો હવે એલઆઈસી હાઉસિંગ ફાઇનાન્સને ઉપલબ્ધ થશે જ્યાં કંપનીને હોમ લોન માટે નવા બજારો અને નવા ગ્રાહકો મળશે.

ઇન્ડિયા પોસ્ટ પેમેન્ટ બેંકની દેશભરમાં ૬૫૦ શાખાઓ અને ૧.૩૬ લાખ બેન્કિંગ ટચ પોઇન્ટ છે. ઇન્ડિયા પોસ્ટ પાસે તેના નેટવર્ક હેઠળ ૨ લાખથી વધુ પોસ્ટમેન અને ગ્રામ્ય ડાક સેવકો છે. આ લોકો પાસે હવે માઇક્રો એટીએમ, બાયોમેટ્રિક ઉપકરણો જેવી સુવિધાઓ છે. હકીકતમાં, ઈન્ડિયા પોસ્ટ પણ બેન્કિંગ સેવા પર ખૂબ ભાર મૂકે છે. એલઆઈસીએચએફએલ સાથે કરાર કર્યા પછી, ઈન્ડિયા પોસ્ટના કર્મચારીઓ તેના માટે બિઝનેસ લાવવાનું કામ કરશે.

ઇન્ડિયા પોસ્ટ ગ્રાહકોને હોમ લોનની સુવિધા મળશે

આઈપીપીબીના મેનેજિંગ ડિરેક્ટર અને મુખ્ય કાર્યકારી અધિકારી જે. વેંકટારામુએ જણાવ્યું હતું કે, એલઆઈસી હાઉસિંગ ફાઇનાન્સ સાથે જોડાણ ઇન્ડિયા પોસ્ટની જે સફર ચાલુ છે તેની મોટી સફળતા છે. હવે અમારા ગ્રાહકોને તેમના પ્લેટફોર્મ પર હોમ લોનની સુવિધા પણ મળશે. અમારા ગ્રાહકોને મહત્તમ સુવિધા આપવાનો અમારો પ્રયાસ છે. આ સિવાય અમારું ધ્યાન ડિજિટલ બેન્કિંગ પર છે.

એલઆઈસી હાઉસિંગ ફાઇનાન્સને નવું બજાર મળશે

એલઆઇસી હાઉસિંગ ફાઇનાન્સના મેનેજિંગ ડિરેક્ટર અને સીઇઓ વાય વિશ્વનાથ ગૌરે જણાવ્યું હતું કે ઇન્ડિયા પોસ્ટ પેમેન્ટ બેન્ક સાથે વ્યૂહાત્મક ભાગીદારીની મદદથી અમે અમારા માટે નવા બજારોની શોધ કરીશું. આને કારણે અમારું કાર્યક્ષેત્ર વિસ્તરશે અને નવા ગ્રાહકો અમારી સાથે જોડાશે. ઇન્ડિયા પોસ્ટ દેશના દરેક ખૂણામાં ઉપલબ્ધ છે. આવી સ્થિતિમાં પોસ્ટ ઓફિસ નેટવર્ક સાથે કરાર કરવો એ અમારા માટે મોટી સફળતા છે.

૬.૬૬ ટકાના દરે હોમ લોનની ઓફર

એલઆઈસી હાઉસિંગ ફાઇનાન્સ હાલમાં ૬.૬૬ ટકાના દરે હોમ લોન આપી રહી છે. જોકે, આ વ્યાજ દર ૫૦ લાખ સુધીની હોમ લોન માટે છે. જો કોઈ પગારદાર હોય અને સારો સિબિલ સ્કોર હોયતો ૫૦ લાખ સુધીની હોમ લોન આ વ્યાજ દરે સરળતાથી ઉપલબ્ધ છે.