ઇમ્ફાલ:આસામમાં પૂરના પાણીએ અત્યાર સુધીમાં ૪૬ લોકોના જીવ લીધા છે. રાજ્યમાં પૂરના પાણીમાં ડૂબી જવાથી વધુ આઠ લોકોના મોત થયા છે. સોનિતપુર જિલ્લામાં બે લોકોએ જીવ ગુમાવ્યો હતો જ્યારે મોરીગાંવ, ડિબ્રુગઢ, દરરંગ, ગોલાઘાટ, વિશ્વનાથ અને તિનસુકિયા જિલ્લામાં એક-એક વ્યક્તિના મોત થયા હતા.વહીવટીતંત્રે પૂર પ્રભાવિત જિલ્લાઓમાં ૫૧૫ રાહત શિબિરો અને વિતરણ કેન્દ્રો સ્થાપ્યા છે, જ્યાં લગભગ ૩.૮૬ લાખ લોકો આશ્રય લઈ રહ્યા છે. પૂરના પાણી તેમના ઘરોમાં પ્રવેશ્યા પછી, ઘણા પૂર પ્રભાવિત લોકો સલામત સ્થળો, ઉચ્ચ સ્થાનો, શાળાની ઇમારતો, રસ્તાઓ અને પુલો પર આશ્રય લઈ રહ્યા છે. દરમિયાન, આસામના કાઝીરંગા નેશનલ પાર્કમાં ૧૧ પ્રાણીઓ પૂરના પાણીમાં ડૂબી ગયા છે, જ્યારે ૬૫ અન્ય પ્રાણીઓને બચાવી લેવામાં આવ્યા છેકારણ કે ૨૯ જિલ્લાઓમાં ૧૬.૨૫ લાખથી વધુ લોકો પ્રભાવિત થયા છે. પૂરના પાણીમાં ૪૨,૪૭૬.૧૮ હેક્ટર પાક વિસ્તાર ડૂબી ગયો છે. આ પૂરથી કુલ ૨૮૦૦ ગામો પ્રભાવિત થયા છે. નેમાતી ઘાટ, તેજપુર, ગુવાહાટી અને ધુબરી ખાતે બ્રહ્મપુત્રા નદીનું જળસ્તર ખતરાના નિશાનથી ઉપર છે. આ ઉપરાંત રાજ્યની અન્ય નદીઓ પણ ખતરાના નિશાનથી ઉપર વહી રહી છે.દરમિયાન, સ્થાનિક વહીવટીતંત્ર, સેના, અર્ધલશ્કરી દળો અને એસડીઆરએફની બચાવ ટુકડીઓ ઘણી જગ્યાએ બચાવ કામગીરીમાં વ્યસ્ત છે આસામના મુખ્યમંત્રી હિમંતા બિસ્વા સરમાએ બુધવારે રાજ્યમાં પૂરની સ્થિતિની સમીક્ષા કરી હતી. કામરૂપ જિલ્લામાં બેઠક બાદ તેમણે પત્રકારોને કહ્યું – ‘રાજ્યમાં વિનાશક પૂર મુખ્યત્વે પડોશી અરુણાચલ પ્રદેશમાં વાદળ ફાટવાના કારણે આવ્યા છે.’