પેરિસ:વિનેશ ફોગાટના પેરિસ ઓલિમ્પિક ૨૦૨૪માંથી બહાર થયા બાદ બુધવારે ભારતને વધુ એક મોટો ફટકો પડ્યો છે. ગોલ્ડ મેડલની પ્રબળ દાવેદાર ભારતની સ્ટાર વેઈટલિફ્ટર મીરાબાઈ ચાનુ માત્ર ૧ કિલોના માર્જિનથી મેડલ જીતવામાં ચૂકી ગઈ હતી. ચાનુ મહિલાઓની ૪૯ કિગ્રા વેઈટલિફ્ટિંગ ફાઇનલમાં ચોથા સ્થાને રહી હતી. ટોક્યોમાં સિલ્વર મેડલ જીતનાર મીરાબાઈ ચાનુએ સ્નેચમાં ૮૮ કિગ્રા અને ક્લીન એન્ડ જર્કમાં ૧૧૧ કિગ્રા સહિત કુલ ૧૯૯ કિલો વજન સફળતાપૂર્વક ઉપાડ્યું હતું. આ પછી ચાનુએ ક્લીન એન્ડ જર્કમાં ૧૧૪ કિલો વજન ઉપાડવાનો પ્રયાસ કર્યો, પરંતુ તે તેમાં સફળ થઈ શકી નહીં અને માત્ર ૧ કિલો વજનથી બ્રોન્ઝ મેડલ જીતવામાં ચૂકી ગઈ. મીરાબાઈ ચાનુએ મહિલાઓની ૪૯ કિગ્રા વેઈટલિફ્ટિંગ ફાઈનલના સ્નેચ રાઉન્ડમાં ત્રીજા પ્રયાસમાં ૮૮ કિગ્રાનો પોતાનો વ્યક્તિગત સર્વશ્રેષ્ઠ ઉપાડ કર્યો હતો. અગાઉ, તેણે તેના પ્રથમ સ્નેચ પ્રયાસમાં સરળતાથી ૮૫ કિલો વજન ઉપાડીને શાનદાર શરૂઆત કરી હતી. ત્યારપછી તેના બીજા પ્રયાસમાં તે ૮૮ કિગ્રાનું પોતાનું સર્વશ્રેષ્ઠ અંગત વજન ઉપાડવામાં નિષ્ફળ રહી. પરંતુ, તે ત્રીજા પ્રયાસમાં તેને હાંસલ કરવામાં સફળ રહી હતી. સ્નેચ રાઉન્ડના અંત સુધીમાં, તેણી ત્રીજા સ્થાને રહી.
Loading ...