દામ્બુલા:ભારતીય મહિલા ક્રિકેટ ટીમ હાલમાં શાનદાર ફોર્મમાં છે. મહિલા એશિયા કપની તેમની બીજી મેચમાં હવે યુએઈને 78 રનથી હરાવ્યું. ટોસ હાર્યા બાદ પ્રથમ બેટિંગ કરવા આવેલી ભારતીય ટીમે તોફાની બેટિંગ કરી અને ટી-૨૦માં પોતાનો સર્વોચ્ચ સ્કોર બનાવ્યો. ભારતે 5 વિકેટે 201 રન બનાવ્યા હતા. જવાબમાં UAE 202 રનના ટાર્ગેટનો પીછો કરતી વખતે નિર્ધારિત 20 ઓવરમાં 7 વિકેટે 123 રન જ બનાવી શકી હતી. ભારતીય મહિલા બોલરોએ શાનદાર બોલિંગ કરી અને UAEને માત્ર 123 રન સુધી રોકી દીધું. ભારતીય ટીમ તરફથી દીપ્તિ શર્માએ સૌથી વધુ 2 વિકેટ લીધી હતી. આ સિવાય રેણુકા ઠાકુર સિંહ, તનુજા કંવર, પૂજા વસ્ત્રાકર અને રાધા યાદવને 1-1 સફળતા મળી છે. UAE માટે કવિશાએ સૌથી વધુ અણનમ 40 રન બનાવ્યા હતા. તેણે પોતાની ઇનિંગમાં 3 ફોર અને 1 સિક્સ પણ ફટકારી હતી. આ સિવાય યુએઈની કેપ્ટન ઈશા રોહિત ઓજાએ પણ 38 રન બનાવ્યા હતા અને ટોસ હારીને પ્રથમ બેટિંગ કરવા આવેલી ભારતીય ટીમના ઈરાદા સાફ થઈ ગયા હતા. ટીમ ઈન્ડિયા શરૂઆતથી જ ઝડપી બેટિંગ કરી રહી હતી અને મોટા સ્કોર તરફ જોઈ રહી હતી. પહેલા શેફાલી વર્માએ પાવરપ્લેનો ફાયદો ઉઠાવ્યો અને 18 બોલમાં 5 ચોગ્ગા અને 1 છગ્ગાની મદદથી 37 રન બનાવ્યા. આ પછી કેપ્ટન હરમનપ્રીત કૌર અને વિકેટકીપર રિચા ઘોષે કમાન સંભાળી. બંનેએ શાનદાર બેટિંગનું પ્રદર્શન કર્યું હતું. કેપ્ટન હરમનપ્રીત કૌરે 140ના સ્ટ્રાઈક રેટથી બેટિંગ કરતા 47 બોલમાં સૌથી વધુ 66 રન બનાવ્યા, જેમાં 7 ચોગ્ગા અને 1 છગ્ગા પણ સામેલ હતા, આ સિવાય રિચા ઘોષે યુએઈના બોલરોને બરબાદ કર્યા હતા. 220ના તોફાની સ્ટ્રાઈક રેટથી બેટિંગ કરતા તેણે 29 બોલમાં અણનમ 64 રન બનાવ્યા હતા. તેની ઇનિંગમાં 12 ફોર અને 1 સિક્સ સામેલ હતી. UAE તરફથી કવિશાએ સૌથી વધુ 2 વિકેટ લીધી હતી. જ્યારે સમાયરા અને હીના હોતચંદાનીને 1-1 સફળતા મળી હતી.