મુંબઈ-

મુંબઈમાં ગત રાતથી ભારે વરસાદ પડી રહ્યો છે. જેના કારણે ઘણાં નીચાણવાળા વિસ્તારોમાં પાણી ભરાઈ ગયા છે. શહેરના કિંગ સર્કલના રસ્તા પર અંદાજે 2 ફૂટ સુધીનું પાણી ભરાઈ ગયું છે. આ સિવાય હિંદમાતા, સાયન, માટુંગામાં પણ પાણી ભરાઈ ગયા છે.

આ અંગે બૃહદમુંબઈ નગર નિગમના જણાવ્યાનુસાર શહેરમાં છેલ્લાં 10 કલાકમાં ભારે વરસાદ થયો છે. આ સિવાય અરબ સાગર ઉપર ચોમાસું સક્રિય થવાના કારણે સોમવારથી સતત મુંબઈમાં વરસાદ વરસી રહ્યો છે. મુંબઈમાં ભારે વરસાદથી ઠેર-ઠેર પાણી ભરાઇ ગયાં છે. જેથી લોકલ પરિવહન સેવા પણ ઠપ્પ થઈ ગઈ છે. આ પહેલા હવામાન વિભાગ દ્વારા અતિભારે વરસાદની આગાહી કરવામાં આવી હતી. હવે તો હાઈટાઈડની ચેતવણી પણ આપી દેવામાં છે. હવામાન વિભાગના જણાવ્યાનુસાર આજે બપોરે હાઈટાઈડ થઈ શકે છે. જેથી સમુદ્રના મોજા 4.45 મીટરની ઉંચાઈ સુધી ઉછળી શકે છે.હાલ હવામાન વિભાગ દ્વારા દરિયાની આસપાસ રહેતા લોકોને ઘરની બહાર ન નીકળવાની સલાહ આપવામાં આવી છે. આ સાથે જ BMCએ મુંબઈના ઘણાં વિસ્તારોમાં લોકોને ઘરની બહાર ન નીકળવાની સલાહ આપી છે.