નવીદિલ્હી,તા.૧૮

જયારે કોઈ વ્યક્તિની આવક ૩ લાખ રૂપિયાથી ૧૫ લાખ રૂપિયા સુધી પાંચ ગણી વધી જાય છે, તો આવકવેરાનો દર છ ગણો વધી જાય છે, જે ઘણો વધારે છે.વડાપ્રધાન નરેન્દ્ર મોદીની આગેવાની હેઠળની નેશનલ ડેમોક્રેટિક એલાયન્સ સરકાર અમુક વર્ગોના વ્યક્તિઓ માટે આવકવેરાના દરો ઘટાડવાનું વિચારી રહી છે. બે સરકારી સૂત્રોના હવાલાથી એક રિપોર્ટમાં આ જાણકારી સામે આવી છે. આ અહેવાલમાં કહેવામાં આવ્યું છે કે સરકાર વપરાશને પ્રોત્સાહન આપવા માટે આની જાહેરાત કરી શકે છે. જુલાઈમાં, નાણામંત્રી ર્નિમલા સીતારમણ નાણાકીય વર્ષ ૨૦૨૪-૨૫ માટે સંપૂર્ણ કેન્દ્રીય બજેટ રજૂ કરશે. માનવામાં આવી રહ્યું છે કે આમાં નવા ઈન્કમ ટેક્સ સ્લેબની જાહેરાત થઈ શકે છે. રિપોર્ટમાં કહેવામાં આવ્યું છે કે વ્યક્તિગત કરમાં ઘટાડો અર્થતંત્રમાં વપરાશને વેગ આપી શકે છે અને મધ્યમ વર્ગ માટે બચતમાં વધારો કરી શકે છે.

અહેવાલ અનુસાર, જે વ્યક્તિઓની વાર્ષિક આવક ૧૫ લાખ રૂપિયાથી વધુ છે (એક ચોક્કસ રકમ જે હજુ નક્કી કરવાની બાકી છે) તેમને આવકવેરામાં રાહત મળી શકે છે. એવું પણ કહેવામાં આવી રહ્યું છે કે સરકાર ૧૦ લાખ રૂપિયાની વાર્ષિક આવક માટે ઈન્કમ ટેક્સ સ્લેબ ઘટાડવા પર પણ વિચાર કરી શકે છે. અન્ય અહેવાલ અનુસાર, સરકાર જૂની ટેક્સ સિસ્ટમ હેઠળ ૩૦ ટકાના ઉચ્ચતમ દરે ટેક્સ લાગતી આવક માટેની નવી મર્યાદા અંગે ચર્ચા કરી રહી છે. નાણાકીય વર્ષ ૨૦૨૩-૨૪માં ભારતની જીડીપી (ગ્રોસ ડોમેસ્ટિક પ્રોડક્ટ) ૮.૨ ટકાના મજબૂત દરે વધી છે, જ્યારે વપરાશ તેના અડધા દરે વધ્યો છે.

લોકસભા ચૂંટણી ૨૦૨૪ પછીના સર્વેમાં જાણવા મળ્યું હતું કે મતદારો ઊંચી મોંઘવારી, બેરોજગારી અને ઘટતી આવકને લઈને ચિંતિત છે. એનડીએ સરકાર બનાવવાનો દાવો કરતી વખતે પીએમ મોદીએ કહ્યું હતું કે તેમની સરકાર મધ્યમ વર્ગની બચત વધારવા અને તેમના જીવનની ગુણવત્તા સુધારવા પર ધ્યાન કેન્દ્રિત કરશે. એવી પણ ચર્ચા છે કે સરકાર ૨૦૨૦માં શરૂ કરવામાં આવેલી સિંગલ ટેક્સ સ્કીમમાં ફેરફાર કરી શકે છે, જે અંતર્ગત ૧૫ લાખ રૂપિયા સુધીની વાર્ષિક આવક પર ૫ ટકાથી ૨૦ ટકા અને ૧૫ લાખ રૂપિયાથી વધુની આવક પર ૩૦ ટકા ટેક્સ વસૂલવામાં આવે છે.

એક રિપોર્ટમાં જણાવવામાં આવ્યું છે કે જ્યારે કોઈ વ્યક્તિની આવક ૩ લાખ રૂપિયાથી ૧૫ લાખ રૂપિયા સુધી પાંચ ગણી વધી જાય છે, ત્યારે ઈન્કમ ટેક્સનો દર છ ગણો વધી જાય છે, જે ઘણો વધારે છે. સરકારે નાણાકીય વર્ષ ૨૦૨૫માં રાજકોષીય ખાધને જીડીપીના ૫.૧ ટકા સુધી સીમિત કરવાનો લક્ષ્યાંક રાખ્યો છે.