પેરિસ:ભારતીય ખેલાડીઓ પેરિસમાં શાનદાર પ્રદર્શન કરતા જાેવા મળે છે. મનુ ભાકરે બે મેડલ જીતીને ઈતિહાસ રચ્યો છે.મનિકા બત્રાએ પણ મેડલની આશા જગાવી છે. આ દરમિયાન ભારતના સ્ટાર ઓલિમ્પિયન અને ગોલ્ડન બોય નીરજ ચોપરા પેરિસના ઓલિમ્પિક વિલેજ પહોંચી ગયા છે. નીરજ પેરિસ પહોંચતાની સાથે જ તેણે સોશિયલ મીડિયા દ્વારા તેના ફેન્સને અપડેટ કર્યા. તેણે એક્સ પર લખ્યું- હેલો, પેરિસ! આખરે ઓલિમ્પિક ગેમ્સ વિલેજ પહોંચવા માટે ઉત્સાહિત. પેરિસ ઓલિમ્પિકમાં એથ્લેટિક્સ ગેમ્સ ૧ ઓગસ્ટથી ૧૦ ઓગસ્ટ વચ્ચે યોજાશે. નીરજ ચોપરા પુરુષોની ભાલા ફેંક સ્પર્ધામાં ભાગ લેશે. જેની ક્વોલિફાયર ૬ ઓગસ્ટે યોજાશે. ભારતીય સમય અનુસાર આ મેચ સ્ટેડ ડી ફ્રાંસ ખાતે બપોરે ૧.૫૦ વાગ્યે શરૂ થશે. જ્યારે ફાઈનલ બે દિવસ પછી ૮ ઓગસ્ટે યોજાશે. નીરજ ચોપરાની ફાઇનલમાં પહોંચવાની દરેક આશા છે. નીરજ ચોપડા ઉપરાંત પાકિસ્તાનના ભાલા ફેંકનાર અરશદ નદીમ પણ અહીં જાેવા મળશે. નીરજ ચોપરાએ ટોક્યો ઓલિમ્પિકમાં ગોલ્ડ મેડલ જીત્યો હતો. તે ફરી એકવાર ઈતિહાસ રચવાની અણી પર ઉભો છે. ચોપરા ઓલિમ્પિકમાં સતત બે ગોલ્ડ મેડલ જીતનાર પ્રથમ ભારતીય એથ્લેટ બની શકે છે.

નીરજે ટોક્યોમાં ૮૭.૫૮ મીટરના થ્રો સાથે ગોલ્ડ જીત્યો હતો. ટ્રેક અને ફિલ્ડ ઈવેન્ટ્‌સમાં ગોલ્ડ મેડલ જીતનાર તે પ્રથમ ભારતીય એથ્લેટ બન્યો હતો. તમને જણાવી દઈએ કે તાજેતરમાં નીરજ ચોપરાની ઈજાને લઈને એક સમાચાર સામે આવ્યા હતા. જાેકે હવે તે સંપૂર્ણપણે ફિટ છે. નીરજ ચોપડાને ઓલિમ્પિકમાં ચેક રિપબ્લિકના જેકબ વડલેઝ સામે કડક સ્પર્ધાનો સામનો કરવો પડી શકે છે. વાલ્ડેઝે તેને ૨૦૨૪ ડાયમંડ લીગ સીઝન (દોહા)માં ૮૮.૩૮ મીટરના થ્રોથી હરાવ્યો હતો. ચોપરાએ ગયા વર્ષે વર્લ્ડ એથ્લેટિક્સ ચેમ્પિયનશિપમાં ગોલ્ડ મેડલ જીત્યો હતો.