લંડન:  ઈંગ્લેન્ડના મહાન ફાસ્ટ બોલર જેમ્સ એન્ડરસને વેસ્ટ ઈન્ડિઝ સામે આજથી શરૂ થઈ રહેલી ટેસ્ટ શ્રેણીની પ્રથમ મેચમાં મેદાન માર્યું છે. જીમીની કારકિર્દીની આ છેલ્લી મેચ છે. ઐતિહાસિક લોર્ડ્સના મેદાન પર રમાઈ રહેલી શ્રેણીની પ્રથમ ટેસ્ટમાં 41 વર્ષીય એન્ડરસનની આ 188મી ઈનિંગ છે. આ મેચમાં ઈંગ્લેન્ડે ટોસ જીતીને પ્રથમ બોલિંગ કરવાનો નિર્ણય કર્યો હતો. એન્ડરસને આ વર્ષે એપ્રિલમાં નિવૃત્તિ લેવાનો નિર્ણય લીધો હતો. જ્યારે ઇસીબીના મેનેજિંગ ડિરેક્ટર રોબ કી, કોચ બ્રેન્ડન મેક્કુલમ અને કેપ્ટન બેન સ્ટોક્સે તેને કહ્યું હતું કે તે 2025-26માં રમાનારી એશિઝ શ્રેણી માટે તેમની યોજનાનો ભાગ નથી. એન્ડરસને ભારતમાં રમાયેલી તેની છેલ્લી શ્રેણીમાં 33.50ની એવરેજથી 10 વિકેટ લીધી હતી. ધર્મશાલામાં છેલ્લી ટેસ્ટ દરમિયાન 700 વિકેટ ઝડપનાર તે પ્રથમ ઝડપી બોલર બન્યો હતો. જેમ્સ એન્ડરસને 21 વર્ષ પહેલા 2003માં લોર્ડ્સમાં તેની કારકિર્દીની શરૂઆત કરી હતી. ટેસ્ટમાં તેનું સર્વશ્રેષ્ઠ પ્રદર્શન પણ આ મેદાન પર આવ્યું છે, તેણે 2017માં વેસ્ટ ઈન્ડિઝ સામે 42 રન આપીને સાત વિકેટ ઝડપી હતી. એન્ડરસને લોર્ડ્સમાં કુલ 28 ટેસ્ટ રમી છે અને 25.15ની સરેરાશથી કુલ 119 વિકેટ લીધી છે. સાતસો ટેસ્ટ વિકેટના આંકડાને સ્પર્શનાર એકમાત્ર ઝડપી બોલર, તે હાલમાં સૌથી વધુ ટેસ્ટ વિકેટ લેનારા બોલરોની યાદીમાં ત્રીજા સ્થાને છે. મુથૈયા મુરલીધરન (800) અને શેન વોર્ન (708) હાલમાં તેનાથી આગળ છે. નવ વિકેટ લીધા બાદ એન્ડરસન સૌથી વધુ ટેસ્ટ વિકેટ લેનારા બોલરોની યાદીમાં બીજા સ્થાને પહોંચી જશે. જોકે, આ સરળ નથી અને એન્ડરસન પણ આ વાતથી વાકેફ છે. તે કહે છે કે જો તે નવ વિકેટ લઈ શકે તો ઘણું સારું રહેશે.