નવી દિલ્હી:  બીસીસીઆઇ સેક્રેટરી જય શાહે રવિવારે ટી-૨૦ વર્લ્ડ કપ 2024 વિજેતા કેપ્ટન રોહિત શર્માને આગામી વર્લ્ડ ટેસ્ટ ચેમ્પિયનશિપ અને આવતા વર્ષે યોજાનારી ચેમ્પિયન્સ ટ્રોફી 2025 માટે કેપ્ટન તરીકેની જાહેરાત કરી હતી. આ સાથે સવાલો ઉભા થયા છે કે શું ભારતીય ટીમ ચેમ્પિયન્સ ટ્રોફી માટે પાકિસ્તાનનો પ્રવાસ કરશે કે પછી આ ટુર્નામેન્ટ પાકિસ્તાનની બહાર કોઈ તટસ્થ સ્થળે યોજાશે. જય શાહે મીડિયાને આપેલા નિવેદનમાં કહ્યું, 'મેં રાજકોટમાં કહ્યું હતું કે અમે દિલ જીતીશું, પ્રતિષ્ઠિત ટ્રોફી જીતીશું અને અમારા કેપ્ટને જૂન 2024માં આ કર્યું. આ જીતમાં છેલ્લી પાંચ ઓવરનો મોટો ફાળો હતો અને આ માટે હું સૂર્યકુમાર યાદવ, હાર્દિક પંડ્યા, અર્શદીપ સિંહ અને જસપ્રિત બુમરાહનો આભાર માનું છું, જય શાહે વધુમાં કહ્યું કે, 'આ જીત બાદ અમારું આગામી લક્ષ્ય વર્લ્ડ ટેસ્ટ ચેમ્પિયનશિપ અને ચેમ્પિયન્સ ટ્રોફી છે. 2025 અને મને વિશ્વાસ છે કે રોહિત શર્માની કેપ્ટન્સીમાં અમે આ બંને ટૂર્નામેન્ટમાં ચેમ્પિયન બનીશું. આનાથી સ્પષ્ટ છે કે ભારતીય ટીમ ચેમ્પિયન્સ ટ્રોફીમાં રમશે. હવે ભારતીય ટીમ પાકિસ્તાન જશે કે ચેમ્પિયન ટ્રોફી પાકિસ્તાનની બહાર યોજાશે તે અંગે હજુ સુધી કોઈ અપડેટ નથી. પરંતુ રાજકીય સંબંધો અને આતંકવાદી ગતિવિધિઓને કારણે ભારતીય ટીમ પાકિસ્તાનનો પ્રવાસ નથી કરતી, જય શાહે કહ્યું, 'ભારતીય ક્રિકેટ ટીમને તેમની ઐતિહાસિક જીત માટે હાર્દિક અભિનંદન. હું આ જીત મુખ્ય કોચ રાહુલ દ્રવિડ, કેપ્ટન રોહિત શર્મા, વિરાટ કોહલી અને રવિન્દ્ર જાડેજાને સમર્પિત કરવા માંગુ છું. ગયા વર્ષે આ અમારી ત્રીજી ફાઈનલ હતી. અમે જૂન 2023માં WTC ફાઇનલમાં હારી ગયા. નવેમ્બરમાં, અમે સતત 10 જીત સાથે ક્રિકેટ ચાહકોના દિલ જીતી લીધા, પરંતુ ODI વર્લ્ડ કપ ટ્રોફી ઉપાડવામાં નિષ્ફળ રહ્યા. હવે અમારો આગળનો હેતુ આ બે મોટી ટૂર્નામેન્ટ જીતવાનો રહેશે.