રાજકોટ, રાજસ્થાનના સિરોહી જિલ્લાના આબુરોડમાં રાજકોટ પોલીસની ટીમને કચડવાનો હિચકારો પ્રયાસ થયાનો બનાવ બન્યો છે. પ્રાપ્ત માહિતી પ્રમાણે આબુરોડ તપાસમાં ગયેલી રાજકોટ પોલીસને કાર હેઠળ કચડવાનો બૂટલેગરો દ્વારા પ્રયાસ કરવામાં આવ્યો હતો. જાે કે, સદનસીબે પીએસઆઇ અને સાથેના કર્મચારીએ સમયસૂચકતા દાખવતા મોટી ઘટના બનતા અટકી છે. સમગ્ર ઘટના અંગે આબુરોડ પોલીસે આગળની કાર્યવાહી હાથ ઘરી છે.

ઘટના અંગે વિગતો આપતા પોલીસે જણાવ્યું હતું કે, ગત સોમવારે રાતે કુવાડવા રોડ પરથી જૂનાગઢ લઇ જવાતો વિદેશી દારૂની બોટલ ભરેલી ટ્રક પકડી હતી. વિદેશી દારૂના જથ્થા સાથે મૂળ હરિયાણાના ડ્રાઈવર સુખવિંદર સિંહ ઉર્ફે મનોજ મનમોહન સિંઘ મુલતાની નામના વ્યક્તિની પણ ધરપકડ કરવામાં આવી હતી. ઝડપાયેલ વ્યક્તિની વધુ પૂછપરછ માટે પોલીસે તેને રિમાન્ડ પર લીધો હતો.

આ દરમિયાન તે સીમકાર્ડ વગરના મોબાઇલમાં ડોંગલથી મોનુ નામના શખ્સનો સંપર્ક કરી તેની સાથે વાતચીત કરતો હોવાનું જણાવ્યું હતું. જેથી પીએસઆઇ આર.એ.સાકરિયા, હેડ કોન્સ્ટેબલ યોગેન્દ્રભાઇ, હેડ કોન્સ્ટેબલ અશોકભાઇ કલાલ આરોપી સુખવિંદરને લઇ આબુરોડ અને હરિયાણા તરફ ગયા હતા અને બુટલેગરનું લોકેશન મળી જતાં પીએસઆઇ સાકરિયા સહિતનો સ્ટાફ આબુરોડના સદર વિસ્તારમાં પહોંચ્યો હતો.

જાે કે, ગુજરાત પોલીસ આવી હોવાની જાણ થતાં બૂટલેગર ત્યાંથી ભાગી જવા માટે કારમાં બેઠો હતો. આ દરમિયાન રાજકોટ પોલીસની ટીમ ત્યાં પહોંચી જતાં બુટલેગરે પીએસઆઇ અને બંને હેડ કોન્સ્ટેબલ ઉપર કાર ચડાવી હત્યા કરવાનો પ્રયાસ કર્યો હતો. પરંતુ પોલીસ કર્મચારીઓએ સમય સૂચકતા વાપરી ખસી ગયા હતા. બુટલેગર ફરી કારથી કચડવાનો પ્રયાસ કરે તે પહેલા જ પીએસઆઇ તેમની સર્વિસ રિવોલ્વરથી ફાયરિંગ કર્યું હતું. જાે કે, બૂટલેગર ત્યાંથી નાસી જવામાં સફળ રહ્યો હતો. સમગ્ર ઘટના અંગે પીએસઆઈએ આબુરોડ પોલીસમાં હત્યાના પ્રયાસની ફરિયાદ નોંધાવતા વધુ કાર્યવાહી હાથ ધરવામાં આવી છે.