અફઘાનિસ્તાન-

વિશ્વને જેની આશા હતી, તે હવે સાચી પડી રહી છે. અફઘાનિસ્તાનમાં તાલિબાન સરકારની રચના થતાં જ ચીન તરફથી 31 મિલિયન ડોલરની સહાયની જાહેરાત કરવામાં આવી છે. ચીને અફઘાનિસ્તાનને ખાદ્ય પુરવઠો અને કોરોના વાયરસની રસી આપવાના નામે આ મદદ આપી છે. ચીને આ મદદની જાહેરાત એવા સમયે કરી હતી જ્યારે તેણે તાલિબાન સરકાર સાથે સંપર્ક જાળવવાની વાત કરી હતી.

ચીને કહ્યું મદદ ખૂબ મહત્વની છે

ચીન તરફથી કહેવામાં આવ્યું છે કે અફઘાનિસ્તાનમાં શાંતિ પુનસ્થાપિત કરવા અને અરાજકતાનો અંત લાવવા માટે આ મદદ ખૂબ જ મહત્વપૂર્ણ છે. અફઘાનિસ્તાનની સ્થિતિ પર પડોશી દેશોના વિદેશ મંત્રીઓની પ્રથમ બેઠકમાં ચીનના વિદેશ મંત્રી વાંગ યીએ કહ્યું કે, ચીન અફઘાનિસ્તાનને 200 મિલિયન યુઆન (આશરે 31 મિલિયન યુએસ ડોલર) આપશે. આ મદદ અંતર્ગત અફઘાનિસ્તાનને અનાજ, શિયાળાનો સામાન, કોરોના રસી અને જરૂરી દવાઓ આપવામાં આવશે.

પાક વિદેશ મંત્રીની અધ્યક્ષતામાં

રસપ્રદ વાત એ છે કે આ બેઠકની અધ્યક્ષતા પાકિસ્તાન દ્વારા કરવામાં આવી હતી. ચીન ઉપરાંત ઈરાન, તાજિકિસ્તાન, તુર્કમેનિસ્તાન અને ઉઝબેકિસ્તાનના વિદેશ મંત્રીઓએ પણ બેઠકમાં હાજરી આપી હતી. પાકિસ્તાનના વિદેશ મંત્રી શાહ મહેમુદ કુરેશી દ્વારા આયોજિત આ બેઠકમાં રશિયાએ ભાગ લીધો ન હતો. ચીનના વિદેશ મંત્રી વાંગ યીએ કહ્યું કે, પ્રથમ બેચમાં ચીને અફઘાનિસ્તાનને 30 લાખ રસીઓ દાન કરવાનો નિર્ણય કર્યો છે.

અન્ય દેશો પાસેથી પણ મદદ માટે અપીલ

તાલિબાન દ્વારા ગત સપ્તાહે દેશમાં સરકાર માટે નવા વચગાળાના મંત્રીમંડળની જાહેરાત કરવામાં આવી છે. આ સાથે, દેશમાં 'ઇસ્લામિક શાસન' જાહેર કરવામાં આવ્યું છે. અમેરિકી રાષ્ટ્રપતિ જો બિડેન પહેલેથી જ કહી ચૂક્યા છે કે અફઘાનિસ્તાને ઘણી લાંબી મુસાફરી કરવાની છે. તાલિબાન સરકાર સાથે સંપર્ક સ્થાપિત કરનાર ચીન પ્રથમ દેશ છે. ચીનના વિદેશ મંત્રી વાંગ યીએ બેઠકમાં સામેલ દેશોના વિદેશ મંત્રીઓને અપીલ કરી હતી કે તેઓ અફઘાનિસ્તાનની મદદ માટે આગળ આવે. ચીને અગાઉ પણ અમેરિકી દળોની ટીકા કરી હતી. ચીને કહ્યું હતું કે અમેરિકી દળોએ અફઘાનિસ્તાનમાં ઘણી તબાહી મચાવી છે.