નવી દિલ્હી: આઇસીસી ટી-૨૦ વર્લ્ડકપ 2024ની પ્રથમ સેમિફાઇનલ મેચ અફઘાનિસ્તાન અને દક્ષિણ આફ્રિકા વચ્ચે 27 જૂનના રોજ ભારતીય સમય અનુસાર સવારે 6 વાગ્યે ત્રિનિદાદના બ્રાયન લારા સ્ટેડિયમમાં રમાશે. આ મેચમાં રાશિદ ખાન અફઘાનિસ્તાનની કેપ્ટનશીપ કરશે અને એડમ માર્કરામ દક્ષિણ આફ્રિકાની કેપ્ટનશીપ કરશે. આ મેચનું લાઈવ ટેલિકાસ્ટ સ્ટાર સ્પોર્ટ્સ નેટવર્ક પર કરવામાં આવશે. જ્યારે લાઈવ સ્ટ્રીમિંગ ડિઝની પ્લસ હોટસ્ટાર પર કરવામાં આવશે. આ બંને ટીમો વચ્ચે કુલ 2 ટી-૨૦આંતરરાષ્ટ્રીય મેચ રમાઈ છે. આ દરમિયાન આફ્રિકાની ટીમે બંને મેચમાં જીત મેળવી છે. હવે અફઘાનિસ્તાન આ સેમીફાઈનલ જીતીને પોતાના આંકડા સુધારવા ઈચ્છશે. ત્રિનિદાદના બ્રાયન લારા સ્ટેડિયમની પીચ બોલરો માટે મદદરૂપ માનવામાં આવે છે. આ પીચ પર ઝડપી બોલરો નવા બોલથી વિકેટ લે છે અને સ્પિનરો જૂના બોલથી વિકેટ લે છે. અહીં બેટ્સમેન માટે રન બનાવવા થોડા મુશ્કેલ છે. આ પીચ પર પ્રથમ દાવનો સરેરાશ સ્કોર 135 અને બીજી ઈનિંગનો સરેરાશ સ્કોર 122 રન છે. દક્ષિણ આફ્રિકા અને અફઘાનિસ્તાન વચ્ચે પ્રથમ સેમિફાઇનલ મેચ ત્રિનિદાદ અને ટોબેગોમાં સ્થાનિક સમય અનુસાર રાત્રે 8:30 વાગ્યે રમાશે. આ સમયગાળા દરમિયાન વરસાદની સંભાવના ઘણી ઓછી છે. હવામાનના અહેવાલ મુજબ, વરસાદની શક્યતાઓ નહિવત્ છે. જો આ મેચમાં વરસાદ પડે છે, તો તે સ્થિતિમાં મેચનું પરિણામ નક્કી કરી શકાતું નથી, તો તેના માટે રિઝર્વ ડે રાખવામાં આવ્યો છે. આ મેચમાં અફઘાનિસ્તાન માટે રહેમાનુલ્લાહ ગુરબાઝ, ઈબ્રાહિમ ઝદરાન, રાશિદ ખાન, નવીન ઉલ હક અને ફઝલહક ફારૂકી મહત્વપૂર્ણ સાબિત થઈ શકે છે. આ તમામ ખેલાડીઓ આ ટૂર્નામેન્ટના ટોપ વિકેટ લેનારા અને રન બનાવનારાઓમાં સામેલ છે. દક્ષિણ આફ્રિકાને ક્વિન્ટન ડી કોક, ડેવિડ મિલર અને હેનરિક ક્લાસેન પાસેથી રન બનાવવાની અપેક્ષા રાખવામાં આવશે. જ્યારે એનરિક નોર્ટજે, કાગિસો રબાડા અને કેશવ મહારાજ બોલ સાથે વિકેટ લેશે.

અફઘાનિસ્તાન: રહેમાનુલ્લા ગુરબાઝ (wk), ઈબ્રાહિમ ઝદરાન, ગુલબદ્દીન નાયબ, અઝમતુલ્લા ઉમરઝાઈ, મોહમ્મદ નબી, કરીમ જનાત, રાશિદ ખાન (c), નૂર અહેમદ, નવીન-ઉલ-હક, ફઝલહક ફારૂકી, નજીબુલ્લાહ ઝદરાન.

દક્ષિણ આફ્રિકા: ક્વિન્ટન ડી કોક (wk), રીઝા હેન્ડ્રીક્સ, એઇડન માર્કરામ (c), ડેવિડ મિલર, હેનરિક ક્લાસેન, ટ્રીસ્ટન સ્ટબ્સ, માર્કો જેન્સન, કેશવ મહારાજ, કાગીસો રબાડા, એનરિચ નોર્ટજે, તબરેઝ શમ્સી.