ગયા મહિને સંયુક્ત આરબ અમીરાતમાં આવેલા ભયંકર પૂરના થોડા દિવસો પછી, ગુરુવારે વહેલી સવારે અબુ ધાબી અને દુબઈમાં ભારે વરસાદ અને તોફાન આવ્યો. આ પછી ઘણી ફ્લાઈટ્‌સ રદ કરી દેવામાં આવી અને દુબઈમાં બસ સેવાઓ સ્થગિત કરી દેવામાં આવી. સ્થાનિક અખબારના અહેવાલ મુજબ, દુબઈ આવતી પાંચ ફ્લાઈટને રાતમાં ડાયવર્ટ કરી દેવામાં આવી, જ્યારે નવ ઇનકમિંગ અને ચાર આઉટગોઈંગ ફ્લાઈટ્‌સ રદ કરી દેવામાં આવી. રિપોર્ટમાં કહેવામાં આવ્યું છે કે અમીરાતની ઘણી ફ્લાઈટ્‌સ પણ રદ કરવામાં આવી છે. સ્થાનિક મીડિયાના અહેવાલમાં જણાવવામાં આવ્યું છે કે દુબઈના નાગરિકો ગુરુવારે સવારે ૩ વાગે જાેરદાર પવન, વાદળની ગર્જના અને વીજળીના કારણે જાગી ગયા હતા.

વરસાદના લગભગ એક કલાક પછી, લગભગ ૪ વાગ્યે, દેશના હવામાન વિભાગે એમ્બર એલર્ટ જારી કર્યું, જેમાં કહેવામાં આવ્યું છે કે દેશના મોટાભાગમાં વરસાદી વાદળો ઘેરાઈ ગયા છે. દેશમાં પ્રતિકૂળ હવામાન ૩ મે સુધી ચાલુ રહેવાની ધારણા છે. સ્થાનિક મીડિયાના અહેવાલો અનુસાર, અબુ ધાબીના કેટલાક વિસ્તારોમાં રસ્તાઓ પર પાણી ભરાઈ જવાના અહેવાલ છે, જ્યારે જેબેલ અલી, અલ મકતુમ ઈન્ટરનેશનલ એરપોર્ટ, દુબઈ ઈન્ડસ્ટ્રિયલ સિટી, દુબઈ ઈન્વેસ્ટમેન્ટ પાર્ક અને જુમેરાહ વિલેજ ટ્રાયેન્ગલમાં જાેરદાર પવન ફૂંકાવાના અહેવાલ છે.દુબઈ એરપોર્ટ અને બે સ્થાનિક એરલાઈન્સે મુસાફરોને એડવાઈઝરી જારી કરી, દુબઈ ઈન્ટરનેશનલ એરપોર્ટ પર મુસાફરી કરતી વખતે વિલંબ માટે તૈયાર રહેવા જણાવ્યું. એક અહેવાલ અનુસાર,યુએઈએ ગુરુવાર સુધી બે દિવસ માટે મધ્યમથી ભારે વરસાદની ચેતવણી જારી કરી હતી, જેનાથી ઓફિસ-જનારાઓને ઘરેથી કામ કરવા અને શારજાહ અને દુબઈમાં અને ડિસ્ટન્સ લર્નિંગ માટે મજબૂર થવું પડ્યું.

ગયા મહિને એપ્રિલમાં, દુબઈમાં ભરે તોફાન આવ્યા બાદ ઓછામાં ઓછા ત્રણ લોકોના મોત થયા હતા અને સામાન્ય જનજીવન ખોરવાઈ ગયું હતું. આ સમયગાળા દરમિયાન, ફ્લાઇટ્‌સ રદ કરવામાં આવી હતી અને અન્ય કામગીરી બંધ કરવામાં આવી હતી. વાવાઝોડાને કારણે ટેક્સી રૂટ પર પાણી ભરાઈ ગયા બાદ દુબઈ ઈન્ટરનેશનલ એરપોર્ટને સામાન્ય થવામાં સમય લાગ્યો હતો.